Laika ka shingjawng lamang hta ginwang kata na hpung masha yawng shang lawm na matu ndau
Myitkyina Ginwang Laili Laika hte Labau Komiti kaw nna woi awn galaw ai laika ka shingjawng lamang hta Myitkyina Ginwang kata shanu nga ai hpung masha yawng shang lawm shingjawng mai sai lam chye lu ai.
Shingjawng lamang hpe laika shabra da sai hte maren, shang lawm shingjawng mai sai re, shang lawm shingjawng da sai mahtai laika pa ni hpe September shata praw 1 ya shani bai kahkyin la nhtawm, jep jen hpung ni kawn September praw 2 ya shani kaw nna nhtoi 10 ya shani du hkra mahtai laika ngau ni hpe jep chyoi na re lam, laika ka shingjawng lamang woi galaw ai yaw shada lam hpe Laili Laika hte Labau Komiti Hpa-awn Saranum La-uh Hkaw Tswi tsun dan ai.
“Anhte amyusha ni, hkristan hpung masha ni mung laika ka ai hte mungkan hpe shatsawm na matu, tinang prat, makau grupyin ni hpe ma shatsawm jahtap lu na matu, ndai laika ka ai masha langai mi a myit masin gaw grai nan simsa ai, myit pyaw ai grupyin hpe akyu jaw na matu myit ai re majaw, ndai kaw shang lawm nna mai kaja ai lam hta tsap lu na matu hte laika ka ai hpaji hte kan bau magam bungli kaw shang tsap wa lu na matu yaw shada ai re” nga nna tsun ai.
Madung gaw Myitkyina Ginwang kata buga hpung 69 kaw na hpung masha kaji kaba yawng shang lawm shingjawng mai ai lam, Hkrang Pan hpe “Makam masham hte seng ai lam, Maumwi hpe gaw “tinang htuk manu ai ga baw shaw nna ka mai ai lam, Ga Shagawp gaw Ginwang a ga baw rai nga ai “Hkristu a kasi ningja hte kaba rawt wa ga”, Sumroi hpe “COVID-19 hte seng nna tinang htuk manu ai ga baw shaw la nhtawm mai ka ai lam”, Sumrai hpe gaw “Pyaw len tsinyam” ngu ai hte shingjawng mai ai re hpe chye lu ai.
Laiwa sai shaning hta gaw laika ka ladat sharin hpawng ni, laili laika hkaw tsun hpawng hte laika ka shingjawng lamang ni lu galaw ai majaw grau nna tang du ai re, daining gaw COVID-19 aten ladaw re majaw, sharin lamang ni nlu galaw ai raitim, laika ka shingjawng lamang hpe gaw shaning shagu galaw ai re lam, Saranum matut tsun da ai kaw na chye lu ai.
