Lailum Awng Ja kaw dap jung nga ai gumshem Myen hpyen dap hpe KIA ni sa htim gasat zing la lu
Myitkyina, Manmaw lam, Lailum Awng Ja kaw dap jung nga ai gumshem Myen hpyen dap hpe October shata 20 ya jahpawt hkying 6:30am aten daram hta KIA ni sa htim gap gasat ai lam chye lu ai.
Dai hpawt hkying 6:30am aten kaw nna gasat poi byin ai hta, shana daw hkying 1:30pm aten daram hta KIA ni padang dip zing la lu sai lam nga ai. Dai hpang, gumshem Myen hpyen dap ni laknak kaba matut manoi naw gap bun nga ai lam, shawng lam na lit nga ai salang ni tsun ai kaw na chye lu ai.
Gasat poi byin nga ai ten Hkaya Bum, Bumre Bum, Hkang Kai Bum, Hpun Pyen Bum kaw nga ai gumshem Myen hpyen dap ni laknak kaba matut manoi gap bun ai sha n-ga, Myitkyina kaw na rawt wa ai Jet nbungli ni hte mung, bawm wa jahkrat bun ai lam chye lu ai.
Lailum Awng Ja kaw dap jung nga ai gumshem Myen hpyen dap shara 3 nga ai hta na, shara langai hpe gaw lai wa sai September shata 16 ya shani zing la lu sai rai nna, ngam nga ai Lailum Balik Kawng hte Hpara Kawng ngu ai shara lahkawng hpe dai ni zing la lu sai lam chye lu ai.
