Lailum Awng Ja mare makau kaw gasat gala majan matut byin
KIO ginjaw ginra, Nam San Yang hpyen man kaw, September shata 17 ya jahpawt hkying 9:00am aten daram kaw nna, gumshem Myen hpyen ni hte KIA, pawng hpawm hpyen hpung ni, Lailum Awng Ja mare makau kaw gasat gala majan laja lana matut byin ai lam chye lu ai.
Gasat poi byin ai shara de Myitkyina maga de na sa wa ai Jet Fighter 4 hte hkying 10:21am aten kaw nna, Rocket, bawm ni jahkrat bun ai lam, shawng lam na salang ni kaw na chye lu ai.
Bumre hte Hka Ya bum kaw nga ai gumshem Myen hpyen dap ni mung, gasat poi byin ai shara, Madi Yang hte Laiza makau grup-yin shara de laknak kaba hkrup mara gap bun ai lam chye lu ai.
Lailum Awng Ja mare makau na gumshem Myen hpyen dap, Army Kawng hpe September shata 16 ya shani hta KIA, pawng hpawm hpyen hpung ni htim gasat zing kau lu sai re.
September shata 16 shana hta sha, KIA Masat (1) Dap Nawng Daju ginra, Sama lam numshe maga de nga ai gumshem Myen hpyen hpung ni hpe KIA ni laknak kaba hte Drone bawm ni sa gap gasat ai lam chye lu ai.
Ya aten ginjaw ginra de gumshem Myen hpyen dap ni hpyen n-gun jat nga dingyang re majaw, gasat poi matut nna laja lana naw byin wa mai ai lam, shawng lam na lit nga ai salang ni tsun ai kaw na chye lu ai.
