Lailum Awng Ja mare makau kaw gumshem Myen hpyen dap hte KIA ni gasat gala majan laja lana matut byin
KIO ginjaw ginra, Nam San Yang hpyen man, Lailum Awng Ja mare makau kaw September shata 28 ya jahpawt hkying 5:00am aten daram kaw nna, gumshem Myen hpyen dap hte KIA ni gasat gala majan laja lana matut byin ai lam chye lu ai.
Gasat gala majan byin nga ai aten Bumre, Hkaya Bum kaw nga ai gumshem Myen hpyen dap ni, majan byin ai shara hte Laiza makau grup-yin de sinat kaba gap shadam bun ai majaw, KIA ni mung laknak kaba hte bai nhtang gap bun ai lam na chye lu ai.
September shata 27 ya shana hkying 5:45pm aten daram hta mung, Dabak Yang hte Ja Pu lam lapran na Sama lam numshe mayan kaw gumshem Myen hpyen dap, Shwe Min, Pyi Tu Tsit pawng hpawm hpyen hpung ni hte KIA Masat (1) Dap Nawng Daju kata na hpyen hpung ni gasat poi byin ai lam, shawng lam shiga lawk kaw na chye lu ai.
Ya aten hta Manmaw, Myitkyina lam mayan rai nga ai Dawhpum Yang hpyen man, Nam San Yang hpyen man hte Mali, Dabak Yang hpyen man shara ni hta hpyen masa shaja hkat nga ding yang re majaw, shani shagu ngu na gasat poi byin nga ai hpe mung chye lu ai.
Mungmyit Sinli Ga (Kachin Sub-State), KIA Masat (6) Dap Ba, Masat (9) Dap Dung ginra ni hta mung, gumshem Myen hpyen dap ni hte TNLA hpyen hpung ni shani shagu ngu na gasat poi byin nga ai hpe ginra masha ni kaw na chye lu ai.
