Laiza Buga hkalup hpung Ramma shawa Chyum sharin hpawng galaw
Laiza Muklum, Ramma komiti ni hku nna, woi awn galaw let Laiza buga hkalup hpung Ramma shawa Chyum sharin hpawng hpe Maran Naw Masat Htingnu kaw galaw la lu sai lam chye lu ai.
Ramma Chyum sharin hpawng galaw ai a yaw shada lam hpe Saranum Galau Ying Myaw ya na zawn tsun ai.
“Ramma ni grau nna Karai Kasang hte rau sha grau grau na shawng lam de shanhte na sak hkrung hkawm sa lam hta rawt jat galu kaba sa wa na matu, COVID byin mat wa ai hpang anhte ramma ni n-gun yawm mat wa ai majaw, ndai zawn shaning shagu Ramma Chyum sharin hpawng hpe galaw ai. Ramma ni grau nna mahku mara di na Karai Kasang hpe dawjau lam hta tang du lu na matu re” nga na tsun ai.
Hpawng hpe April shata 14 ya hte 15 ya lahkawng ya sharin sa wa na rai nna, lakjat hku na gaw KBC ramma hpa-awn, Sara Sabaw Naw Din hte Manmaw Ginwang Ramma hpa-awn, Saranum Sagaw Bu Bu ni kaw nna sharin sa mat wa na re.
Ramma Chyum sharin hpawng hpe Mung Seng Yang, Mungpyaw kawng, Ja Htu Kawng hte Laiza na ramma ni shang lawm nna, masha marai (190) daram sa du sharin hkam la ai lam chye lu ai.
