Laiza Ginwang Pati Komiti hkumra hpawng galaw
16th lang na Laiza Ginwang Pati Komiti hkumra hpawg hpe Ginwang Pati Komiti Rung, Wun Dan Gawknu kaw July shata 13 ya shani kaw nna 15 ya shani du hkra, 3 ya tup galaw la lu sai re.
Hpawng hta KIO hpung pati hte seng ai lam ni, magam dap hte seng ai lam, makawp maga dap hte seng ai lam, mung shawa hpyen hpung hte seng ai lam, hkamja dap hte seng ai lam, hpaji dap hte seng ai lam, amyu shayi komiti hte seng ai lam, buga gaw sharawt hte seng ai lam, tara masa magam dap hte seng ai lam, masha pru shang gawnhkang magam dap hte seng ai lam, hkai rem magam dap hte seng ai lam hte kaga hkum sum hpa ni hpe jawm bawngban dawdan minutes laika masat la lu sai lam, Laiza Ginwang Pati Komiti Amu Madu, Salang Kaba Npawp Sai Bum Wai Du tsun ai.
“Hpung Pati gaw lam woi ning shawng ai ngu ai gawda tara kaw lam masan tawn da ai hte maren, hpung pati a lam masan jasat jasa hpe manoi sung lang nna hpung pati kata kaw asuya Magam Dap, Makan Dap kata galaw sa wa na bungli masing ni hpe hkumra kaw la bang nna bawngban dawdan minutes ka masat rai nna, Magam Dap, Makan Dap gaw bungli hpe jen ren tatut awng dang hkra gun hpai galaw sa wa lu na matu hte Wunpawng Mungdan Shanglawt Hpung a yaw shada ai bandung de sa wa lu na matu yaw shada ai re” nga nna Salang Kaba matut tsun ai.
Hpawng hta Laiza Ginwang Pati Komiti kata Ginwang Daw Pati Komiti ni, Masat (18) Buga Dap Dung Pati Komiti ni, Laiza Ginwang Amyu Shayi Komiti ni hte Ningawn Daju Pati Komiti ni sa du shang lawm bawngban ai re hpe chye lu ai.
