Laiza Jau Ginwang Ramma ni hte Sakhkung Mungdaw Ramma ni a (1) lang na hkrum zup hpawng galaw
Laiza jau Ginwang Kahtawlik ramma ni hte Sakhkung mungdaw kahtawlik ramma ni a (1) lang na hkrum zup hpawng lamang hpe Laiza jau Ginwang Nazareth Zunlawng hta jahpawt hkying 9:00am aten hta galaw hpang ai lam chye lu ai.
Hkrum zup hpawng galaw ai a yaw shada lam hpe Wa Jau Columban Labang Lar Di ( Ningtau Ginwang Up Jau, Youth Director ) kaw nna ya na zawn tsun ai.
“Madung gaw masum hpe yaw shada ai, ( 1 ) gaw Kahtawlik Nawku Hpung masha ni a matu gaw Mungdan madin, Myusha madin n nga ai. Dai majaw yawng hkra hpu nau hkrai, nta masha langai sha re ngu ai lam hpe grau chye na, mu mada, hkamsha lu na matu, ( 2 ) Ramma ni tinang gara de mi du tim, du ai shara kaw ti-nang a Nawku Hpung na jawng hpe tam la chye nna Makam masham hta sak hkrung na matu, ( 3 ) Gara kaw mi du tim, Ramma hpawng lamang ni hta shang lawm chye na matu yaw shada ai rai ga ai”
Bai galaw na ( 2 ) lang, ( 3 ) lang a matu yaw shada lam nga ga ai, dai hpe gaw Miwa Mung na jawng dat ai ten hpe maram nna shaning shagu galaw na matu yaw shada da ai, ya na zawn Miwa Gumsan Mungdan na ramma ni hte Fellowship lamang galaw ai gaw Myen Mung hta pyi ndai nambat langai lang re, nga nna Wa Jau matut tsun dan ai.
Ramma hkrum zup hpawng hta Wunpawng Mungdan Shanglawt Kongsi Ningbaw Malai ( I ), KIO Ramma Woi Awn Komiti Ningbaw, Du Kaba Sumlut Gun Maw kaw nna mung, amyusha hte seng ai lam hpe hpaji jaw n-gun jaw mungga tsun ai hta “Nanhte ramma ni hpe mahkawng ai gaw, Langai hta tinang a amyu hpe tsawra ai majaw re ai. Lahkawng hta gaw amyu sha gawgap lam galaw mayu ai myit jasat a majaw ya na zawn hpawng ai re. Dai ni ndai kaw hku hkau ai lam gaw aten galu na hkuhkau na matu ningmu bung na matu ningpawt ninghpang lu ai hte tinang amyu galoi mung ngang grin ai lam de sa wa lu na matu rai u ga” nga nna tsun n-gun jaw ya ai.
Shana daw hkying 1:50pm aten hta gaw Du Kaba Nhpang Naw Bu kaw nna mung, Ka-ni nanghpam hte seng nna ningmu jaw sanglang dan ai.
Ndai ramma fellowship hpawng hta du sa ai ramma yawng marai 300 jan hta Miwa Gumsan Mungdan, Sakhkung Mungdaw kata na Jau Ginwang 4 rai nga ai Yin Kyang Jau Ginwang, Lungchuan Jau Ginwang, Mangshi Jau Ginwang, Shweli Jau Ginwang na ramma marai 78 tup shang lawm ai lam chye lu ai.
