Laiza Lahta Tsang Jawng a 2023-2024 ning hpaji ladaw awng jawngma mying jahpan shale
Laiza Lahta Tsang Jawng a 2023-2024 ning hpaji ladaw awng jawngma mying jahpan hpe February shata 26 ya shani shale sai lam chye lu ai.
2023-2024 ning hpaji ladaw san poi kaba hpe KG kawn tsang 9 du hkra na jawngma ni February shata 12 ya shani kaw nna, lani mi ginhpan lahkawng hku na htai hpang wa ai hta 15 ya shani htai ngut sai hte maren, awng jawngma mying jahpan hpe dai ni shale sai re lam, Laiza Lahta Tsang Jawng Up Saranum Kaba Singneng Ja Mai tsun ai.
“Dai ning na hpaji ladaw hta gaw mung masa mayak a majaw, nmyit mada ai jawng ni pat da ra ai, Munglai Hkyet mabyin hkan e anhte jawngma ni asak si sum mat ai ni lawm ai, jawng bai lung wa ai shaloi mung hkrit let sha bai lung taw nga ra ai, mung masa na majaw san poi ni hpe mung, lawan htai ra ai lam ni nga mat ai” nga nna Saranum Kaba tsun ai.
Jawng hta jawngma ni shani shagu laika sharin ai hta masat jaw ai lam ni nga ai majaw, jawngma ni san poi grai hkrat ai lam nnga ai, shawoi shaning na zawn rai na, san poi hpe sha madung dat mat ai rai yang dai ning gaw ma ni hkrat ai lam law wa na re nga nna, Saranum Kaba matut tsun ai.
Dai ning na hpaji ladaw hta Laiza lahta tsang jawngma yawng marai 1204 san poi shang htai ai hta, 1139 awng nna, tsa hta shadang hku na nga yang 94.6 awng nna, 5.4 hkrat nhtawm, lahta tsang jawng hta KG kawn tsang (10) du hkra jawngma yawng marai 1516 nga nhtawm, sara/num yawng marai 84 nga ai re lam chye lu ai.
Lai wa sai February shata 24 ya shani hta gaw Laiza lapran tsang jawng a awng, sum jahpan hpe shale sai rai nna, 2023-2024 hpaji ladaw a tsang (10) san poi hpe mung, du wa na March shata hta san wa na re lam chye lu ai.
