Laiza Lahta Tsang Jawng kaw kraw madai hkrangpan shingni madun lamang galaw
Irrawaddy Organization ni woi awn nhtawm, Laiza lahta tsang jawng Rawt Ninghkawng Gawknu kaw December shata 22 ya shani hkying 10:00am aten hta, hkrangpan myit lawm ai jawng ma soi shapraw tawn ai kraw madai hkrangpan shingni madun lamang galaw la lu sai re.
Laiza Lahta Tsang Jawng kaw laiwa sai 2017 ning kaw nna hkrangpan soi sharin hpang wa ai rai nna, hpyen yen Ma ni a hkam sha lam hpe sumla hku nna hkrang shapraw soi ai re lam, ya aten hkrangpan soi sharin ai sara/num ni marai 5 hte hkrangpan soi ai jawngma yawng marai 300 jan nga ai re lam, Laiza Lahta Tsang Ningtau Jawng Up Sara Tangbau San Awng tsun ai.
Ya na zawn hkrangpan madun lamang galaw ya ai marang e kabu n gun lu ai re sha n-ga, asak hkrung ai hkrangpan byin wa hkra grau nna soi shakut mayu ai re. Anhte hpyen yen Ma ni a kraw kata hta, maroi n nyi hkam sha nga ai lam ni hpe lu soi shapraw ai majaw, myit hkyem sa shangun re. Hkrangpan soi ai lam hta mung, matut n gun jaw la na hpe myit mada ai lam, hkrangpan hpe tatut soi shakut nga ai Shadang Ngyem Htoi San Awng tsun ai.
Hkrangpan madun lamang hpe shawng nnan galaw ai rai nna, Hkrangpan hpe 2021ning January shata 10 ya shani du hkra madun da na re lam, ya aten Laiza lahta tsang jawng hta jawng sara/num marai 74 hte jawngma marai 1106 jan hpaji sharin hkam la nga ai re.
