Laiza Muklum hpaji jawng sara/num ni hpe Ninggawn mungmasa ningmu jahpaw hpawng galaw

Laiza Muklum kata nga ai hpaji jawng shagu na sara/num ni hpe Laiza Lahta Tsang Jawng, Rawt Ninghkawng Gawknu kaw December shata praw 2-3 ya laman Ninggawn mungmasa ningmu jahpaw hpawng galaw ai re.

Ndai hpawng hpe Laiza Muklum Pati Komiti ni woi awn ai kata, Muklum Hpaji   jawng pati lakung ni tatut woi awn galaw ai rai nna, hpawng hta KIC Ningbaw Malai (I) Du Kaba Sumlut Gun Maw hte Ningtau Ninggawn Amu Madu Salang Kaba Labang Doi Pyi Sa kaw nna ninggawn mung masa hte seng ai lam hpe ningmu jahpaw hkaw tsun dan ai lam, ga san ga htai ladat ni hte madung sharin ya ai re lam chye lu ai.

Htawm hpang e galu kaba wa na kashu kasha ni hpe Ninggawn mungmasa hte seng ai lam hpe grau nna chye chyang shangun mayu ai majaw, hpaji jawng ni hta tatut litla sharin ya nga ai jawng sara/num ni, shawng nnan hkawn hkrang da nna Ma ni hpe bai gin len sharin achyin ai lam hta myu tsaw mung tsaw myit ngang ngang kang kang hte galu kaba wa ai kashu kasha ni tai wa lu na matu madung yaw shada let galaw ai re lam, Laiza Muklum Pati Komiti Tingnyang Up, Muklum Uphkang Du, Salang Kaba Wala Gum Ja Du tsun ai.

Ningmu jahpaw hpawng hta Laiza Muklum kata na jawng ni rai nga ai Mung Lai Hkyet lawu tsang jawng, Woi Chyai Hpyen Yen lawu tsang jawng, Sama Ginwang Sasana lahta tsang Jawng, Laiza lahta tsang jawng hte Laiza lapran tsang jawng kaw na sharin sara/num ni marai 119 shang lawm ai hte pang 2 hku galaw la lu sai re.

Ndai Ninggawn mungmasa ningmu jahpaw hpawng gaw dai ning shawng nnan lang galaw ai lam rai nna, ningmu jahpaw ai lam hpe hpaji jawng ni hta sha n-ga, Muklum kata nga ai ramma ni hpe mung, matut galaw sa wa na re lam chye lu ai.