Laiza muklum hta Majan bai byin hpang ai (10) ning hpring masat masa hku nna Hkrang pan madun lamang galaw
Jinghpaw mungdaw kata hta Wunpawng Mungdan shanglawt hpyendap (KIA) hte Tatmataw Myen hpyen dap ni 2011 ning kaw nna kalang bai byin hpang wa ai majan (10) ning hpring masat masa hku nna hkrang pan, Cartoon, Sumrai hte Video projector madun ai lam hpe Laiza Muklum, Hparat Panglai madun gawk hta June praw (9) ya shani hkying 8:00am aten kaw nna hkying 5:00pm aten laman hta galaw ai re.
Ndai hkrang pan madun lamang hpe Laiza muklum hta nga ai NGOS hte CSOS hpung ni kaw nna pawng hpawm woi awn galaw ai re hte June praw (8) ya shani hta mung Laiza Muklum kata maza hta ai lamang hte wan shadaw shadun nna akyu hpyi ai lamang ni mung galaw ai re.
“Kaja wa nga yang ndai lamang gaw anhte nkam galaw ai lamang re. Majan a majaw ndai hpyen yen tsin yam hkrum sha ai aten (10) ning ladaw ngu gaw anhte amyusha ni a matu, mungdan a matu kade daram hkrat sum machyi mat ai, bai nna hpyen yen ngu ai hta anhte myusha ni a 10 % shadang gaw majan a majaw machyi hkrat sum nga ai sha n-ga, kaga mungshawa ni yawng mung ndai tsin yam ni hpe hkam sha taw nga ai hku re. Bai nna (10) ning na ai hpang gaw Myen mungdan ting hta majan byin nna hpyen yen mungshawa tai wa sai re. Daini (10) ning hpring ai hpang anhte ra sharawng ai gaw “Just Peace” “ Tara Rapra ai Simsa Lam a Matu Gasat ai ” re. Dai majaw Tara Rap Ra ai lam hpe lu ai aten du hkra matut nna majan shang gasat sa wa ga ngu yaw shada let ndai lamang hpe galaw ai re.” nga nna Lit nga ai Saranum langai tsun ai.
Ndai hkrang pan madun lamang hpe Majan bai byin hpang ai (10) ning ladaw laman hta kaning re lam ni hpe, kade daram du hkra anhte lu galaw da ngut sai, shajin da ngut sai, kade daram hkrat sum machyi da sai ngu ai hpe maram dinglik lu na matu galaw ai re lam, matut tsun dan ai.
