Laiza Muklum hta share shagan masat ninghtoi hpawng galaw

Wunpawng Mungdan hte Amyu sha ni a matu asak ap nawng mat wa sai, myu tsaw share shagan ni hpe myit dum ai masat ninghtoi hpawng lamang hpe, August praw 10 ya jahpawt hkying 8:00am aten hta Laiza Muklum Sinpraw Majai Manau wang gawknu hta mungshawa dapshawa yawng marai ( 1,000 ) jan shanglawm ai hte galaw ai hpe chye lu ai.

Hpawng lamang hta Wunpawng Mungdan Amyu sha Dawnghkawn hte Wunpawng Mungdan hte Mungdan sha ni a matu asak ap nawng mat wa sai myu tsaw share shagan ni hpe baw gum hkungga jaw ai lam galaw ai.

Hpung woi sara ni kaw na akyu hpyi ya ai hta, share shagan ni a matu hte shanhte a nta masha rai nga ai Kanu Kawa, madun jan kashu kasha ni a matu, ginjaw komiti tinyang up hte ginjaw salang ni yawng hkamja lu na matu, Wunpawng Amyu sha ni a shawnglam mungmasa ninggam tsaw, rawt jat wa na matu hte amyu sha lawt lu lam hta Wunpawng amyu sha ni grau nna myit hkrum kahkyin gumdin let shanglawm shakut shaja lu na matu akyu hpyi ya ai. KIO tingnyang up a 2017 ning, share shagan masat ninghtoi mungga hpe Du kaba Maran Zau Tawng kaw na hti shalai ya ai hpe chye lu ai.

Share shagan masat ninghtoi hpe Mungdan kata hte Maigan kaw du nga ai Wunpawng amyu sha ni yawng mung galaw nga ai hpe chye lu ai.