Laiza Muklum kata hkamja san seng wa lu na matu hka lam ni hpe jasan jaseng ai lam galaw
Laksan Laiza Muklum Pati Komiti kawn woi awn let Laiza Muklum kata hkamja san seng wa lu na matu Laiza hka hte Mawdaw lam makau jasan jaseng ai lam hpe Laiza Muklum hkamja san seng komiti kawn tatut lit la woi awn nna, August shata 15 ya jahpawt hkying 8:00am aten kaw nna shana daw hkying 2:00pm aten daram du hkra galaw ai lam chye lu ai.
“Laiza hka gaw yu chyai na zawn re hpa mung nnga ai, tsing hte plastic maza hkrai re majaw dai hpe jasan jaseng lam galaw ai, Miwa ni mung shanhte hkran maga shanhte galaw ai, ndai gaw dai ni galaw nna sha ngut ai baw nre ra jang ra ai hku jawm galaw mat wa na masing nga ai” nga nna Laksan Laiza Muklum Pati Komiti Amu Madu Salang Kaba Lasi Naw Htoi Ja tsun ai.
Laiza hka hpe jasan jaseng lam galaw ngut ai hpang gaw Nga mayat shara Nga kawn shara ni jawm galaw mat wa na, dai kaw Nga nmai hkwi sha ai, nmai dawn sha ai, Nga bawm nmai kapaw ai ngu ai lam ni hpe Miwa hte lahkawng maga jawm galaw sa wa na re lam, Salang Kaba matut tsun ai.
Dai ni jasan jaseng galaw ai hta Laiza Muklum kata kaw lwi taw nga ai Hka Ya Hka, lawk 2 lawk 3 kata na Hka, lawk 5 na Gawja Hka, Lunghkrut Hka ni rai nna, magan gun ni hte mungshawa yawng marai 700 jan shang lawm galaw ai lam chye lu ai.
