Laiza Muklum kata hte hpyen yen dabang ni hpe lockdown dawm
Laiza Muklum kata hte Je Yang, Hpum Lum Yang, Dumbung hpyen yen dabang jarit mayan ginra ni hpe August shata 26 ya shani kaw nna lockdown dawm dat sai lam, Ginjaw COVID-19 Ana Zinli Makawp Ninghkap Komiti kaw na ndau laika shapraw da ai lam chye lu ai.
Dai ni lockdown dawm sai raitim, Ginjaw COVID-19 Ana Zinli Makawp Ninghkap Komiti kaw na masat da ai COVID-19 ana makawp ninghkap tara ni hpe mungchying mungshawa yawng matut hkan sa ra na lam ndau da ai.
Masha hpawng chyawm ai lam n galaw na, Mask n shakap ai npru hkawm lu na, lu sha seng kaw dung sha ai lam n galaw na (parcel la wa na), seng dut masha yawng Mask shakap ra na hte ra wa ai hta hkan nna, mare lawk ni de swab jep ai lam dingyang galaw na re lam, ndau laika kaw na chye lu ai.
Lai wa sai July shata 26 ya shani Je Yang hpyen yen dabang hte Woi Chyai hpyen yen dabang kaw checkpoint shinggan kaw na shang wa ai mungshawa langai hta, COVID-19 ana jep mu lu ai majaw, Laiza Muklum kata hte makau grup yin na hpyen yen dabang ni hpe July shata 27 ya shani kaw na lockdown masat nhtawm, COVID-19 ana jep ai masing kaba dabat (3) lang galaw sai re hpe mung chye lu ai.
