Laiza Muklum kata na hpaji jawng ni hpaw sharin nga sai
Laiza Muklum kata kaw na hpaji jawng ni hpe July shata 20 ya shani kaw nna hpaw sharin hpang nga sai lam chye lu ai.
COVID-19 aten ladaw laman jawng hpaw hpang lu na matu, Laiza makau grup yin jawng shagu na jawng sara/num ni hte jawngma ni marai 404 hpe COVID-19 ana makawp maga ladat ni sharin ya ai hte kaga ra ai lam ni hkyen shajin taw ai re majaw, ya aten she jawng hpaw lu ai re lam chye lu ai.
Jawng lung nhtoi hpe laban bat hpang 1,3,5 ya hta gaw lawu tsang daw ni jawng lung na rai nna, bat hpang 2,4,6 ya hta gaw lapran tsang ni lung na re hte lahta tsang ni gaw shani shagu jawng lung na re lam chye lu ai.
Jawng lung nhtoi bat mi hta 3 ya sha lu lung ai re majaw, laika sharin ai ladat hpe homework jaw ai ladat hte sharin sa wa na rai nna, sharin sara/num ni gaw shani shagu jawng sa nhtawm, jawngma ni mara dat ai homework ni hpe jep ya ai ladat hte galaw na re majaw, jawngma kanu kawa ni mung jawngma ni hpe jaw dat ai homework hpe lu woi awn galaw hkra ningmu jahpaw da ai re lam, Ginjaw Hpaji Dap Amu Madu Sara Kaba Marip Naw Htoi tsun ai.
Laiza Lahta tsang jawng hta ya aten jawngma jahpan marai 1030 rai sai hte matut nna jawngma naw hkap la ding yang rai nna, lai wa sai 2019-2020 hpaji ladaw hta gaw jawngma marai 1100 jan nga ai lam chye lu ai.
COVID-19 nau ntsang ra ai Sinpraw Ginwang Ginjaw kaw na hpaji jawng 27, Dingdung Ginwang Ginjaw kaw na hpaji jawng 59 hte Ginjaw Ginra kaw na hpaji jawng 12 hpe gaw July shata praw 6 ya shani kaw nna hpaw sharin hpang sai rai nna, Mai Ja Yang Amyusha Dakkasu, Mai Ja Yang Amyusha Hkawlik hte Federal Law jawng ni mung hpaw hpang na matu hkyen shajin nga sai lam chye lu ai.
