Laiza Muklum kata na hpaji jawng ni hta Mask garan
Laiza Muklum Balik Dap hte Immigration Makan Dap kaw nna woi awn nhtawm, October shata 12 ya jahpawt hkying 6:00am aten kaw nna hkying 8:00am aten du hkra Laiza Lahta Tsang Jawng, Lapran Tsang Jawng, Sama Ginwang Sasana Lahta Tsang Jawng hte Woi Chyai Hpyen Yen Lawu Tsang Jawng na jawngma ni hpe Mask garan jaw ai lam galaw ai re.
COVID-19 ana byin hkrum nga ai aten hta Muklum Balik Dap kaw nna mungshawa ni hpe Mask shakap na lam hte seng nna shani shana tsun sadi jaw ai lam galaw nga ai sha n-ga, Mask hpe tatut garan jaw ai lam rai nna, jawngma kanu kawa ni mung tinang a kasha ni hpe Mask hpe atsawm chye jai lang hkra yu gawn na amtu shadut mayu ai lam, Muklum Balik Dap Dabang Reng Magam lit gun hpai nga ai Du Ngalang Myu Htoi Awng ya na zawn tsun dan ai.
“Jawngma ni hpe yaw shada pan dung tawn ai re majaw, kanu kawa ni tinang a kashu kasha ni hpe ndai hta grau nna gawn ya yang hkrak ai, nkau jawngma ni gaw Mask langai hpe jawng kaw na wa nna hkrup mara kam ai kaw tawn da nna, jawng sa wa ten hta 2, 3 ya jawm lang ai hpe mu chye ai. Kanu kawa ni kaw nna kashu kasha ni hpe ndai hku nbyin hkra kalang mi lang ngut sai hpe bai n kahtap lang ai sha hkamja lam hte bung pre hkra lu makawp maga sadi ya yang kaja na re” nga nna tsun dan ai.
Muklum Balik Dap hte Immigration ni pawnghpawm nna Mask garan ai lam gaw ndai lang shawng nnan galaw ai lam rai nna, Muklum Uphkang Rung a lam masan ya ai hta hkan nna matut galaw sa wa na masing nga ai lam chye lu ai.
