Laiza Muklum kata na jawngma ni hpe gawng shakyang sharin ya

Laiza Muklum Jawng Pati lakung ni woi awn nna, Laiza Lahta Tsang Jawng, Laiza Lapran Tsang Jawng hte Sama Ginwang Sasana Lahta Tsang Jawng kaw na tsang (7) lahta jawngma ni hpe January shata 11 ya shani kaw nna 22 ya shani du hkra gawng shakyang sharin ya na re lam chye lu ai.

Gawng shakyang hpe Mung Seng Yang hpyen sharin shakyang dap dung kaw na sharin sara ni kaw nna sa du sharin ya ai re lam chye lu ai.

Ya na zawn jawngma ni hpe gawng shakyang sharin ya ai yaw shada lam gaw, jawngma ni hkumhkrang bawngring galu kaba wa na matu, hkamja zet let wa na matu, wuhpung wuhpawng hte shada da kanawn mazum chye na matu, madat mara chye ai ni tai wa lu na matu re lam, Laiza Lahta Tsang Jawng Up, Saranum Kaba Singnyen Ja Mai tsun ai.

Ndai sharin lamang gaw, Laiza Muklum Jawng Pati shamu shamawt lam rai nna, nhtoi (10) ya tup sharin sa wa na re lam chye lu ai.