Laiza Muklum kata ten lai malu masha ni hpe wan nat kau ai lam galaw

Laksan Laiza Muklum Uphkang Rung hte Hkamja Dap ni woi awn nna, Laiza Muklum kata gat seng hkan na ten lai malu masha tsi mawan ni hpe March shata praw 6 hte 7 ya, 2 ya laman rim la lu ai arung arai ni hpe March shata 10 ya shani wan nat jahten kau ai lam chye lu ai.

“Tsa chyaru hpe Muklum kata kaw tara shang dut na ahkang jaw dut shangun ai lam nnga ai, hkum pat tawn da ai malu masha re majaw, hkam daga nnga ai tsi, tsa ni hpe rim ai lam galaw ai re. Ndai zawn re lu sha sha ai majaw hkum hkarang hta machyi makaw byin wa nna, hkum hkrang hkamja lam hpe ahtu hkra shangun ai majaw rim zing kau ai lam galaw ai re” nga nna yaw shada lam hpe Laksan Laiza Muklum Ningtau Uphkang Du, Salang Kaba Myitung Chyang Bawm tsun ai.

Mungshawa ni mung gat seng hkan na Muk ni, malu masha ni mari sha ai shaloi, aten lai nlai hpe atsawm yu nna mari sha ga, ndai zawn re aten lai ai malu masha mari sha ai majaw, anhte a hkumhkrang hkamja lam hpe ahtu hkra shangun ai lam law law byin ai re. Dai re majaw aten lai nlai hpe atsawm jep joi nna mari sha ai lam galaw ga, nga nna Salang Kaba Myitung Chyang Bawm tsun ai.

Gat seng dut taw nga ai lauban launa ni mung tinang seng hta mara tawn da ai muk ni malu masha ni hpe aten lai nlai jep nna, aten lai ai malu masha ni hpe mungshawa ni hpe ndut shabra ya ai sha, hkamja lam makawp maga ai hku nna zing la kau nhtawm, aten nlai ai hpe sha dut gin len ya hkat ga, mungshawa ji nban yawng a hkumhkrang hkamja lam hpe jawm makawp maga ai lam galaw nga ga, nga nna Salang Kaba matut tsun ai.

Rim kau lu ai arung arai ni gaw tsi, tsa, ten lai malu masha ni hte Ma jahkrat tsi mawan ni hpe rim kau lu ai rai nna, arung arai manu sawn yang Myen gumhpraw Kyats 5, 401, 950 (Sen Manga Shi Mali Hkyingmi Jahku Tsa Manga Shi) hte Miwa gumhpraw Yuan 7446 (Hkying Sanit Mali Tsa Mali Shi Hkru) daram sum machyi ai lam chye lu ai.

Ndai zawn aten lai malu masha jep joi ai lam hpe Muklum kata komiti a dawdan minutes hte maren Hkamja Dap ni, Muklum kata Makan Dap shagu na hpa-awn ni hte ta gin dun nna shaning shagu galaw nga ai re hpe mung chye lu ai.