Laiza Muklum kata Mihprap Wan arung arai dut shabra seng hpaw

Wunpawng Mungdan Shanglawt Asuya, Ginjaw Sut Masa Magam Dap kaw nna Mihprap Wan arung arai dut shabra seng hpe Laiza Muklum kaw June shata 26 ya jahpawt 7:00am aten hpaw da lu sai lam chye lu ai.

Ndai seng hta Mihprap Wan hte seng ai arung arai hpan hkum mai lu sai rai nna, Mihprap Wan arung arai ni hpe manu hkyem sa ai hku dut shabra ya nga ai sha n-ga, mungshawa ni ra ai hta hkan nna nta di atsawm hkan shakap ya na re lam chye lu ai.

“Anhte mungshawa ni lama ma Wan arung arai ra yang Miwa seng kaw na sha wa la ra ai ndai hpe anhte gaw, anhte a gumhpraw ni anhte shada kaw bai shang na matu rai nna, mungshawa ni quality hkrak ai Mihprap Wan arung arai ni gu gu ra ra jai lang lu na matu yaw shada let galaw ai re” nga nna Wan arung arai dut shabra seng kaw na lit nga ai Engineer Zinwa Zau Lawt tsun ni.

Mihprap Wan arung arai dut shabra seng hpe Laiza Muklum kata ndai seng shawng nnan hpaw hpang ai rai nna, matut nna Mai Ja Yang Muklum hta mung bai hpaw sa wa na lam chye lu ai.