Laiza Muklum Ramma Komiti ra lata poi galaw

Langai lang na 2020 ning Laiza Muklum Ramma Komiti Ningbaw, Amu Madu hte kaga komiti ningbaw ra lata sindan pa bang nna lata dang san lamang hpe Laiza Muklum Ramma Ginra kaw July shata 25 ya jahpawt hkying 8:00am aten kaw nna galaw ai lam chye lu ai.

Ra lata hkam ai Nomination ni gaw Ramma Ningbaw hku nna shadang Kumhtat Naw Lawn hte shadang Lamung Seng Ring, Ramma Komiti Amu Madu hku nna shadang Mangshang Doi Lat Awng hte shadang Maji Myu Myat, Hpaji Ningli Komiti hku nna shayi Lagoit Myu Pan hte shayi Lahpai Nang San, Shingni Komiti Ningbaw hku nna Shadang Lahpai Hkun Ring hte shadang Chyinghtawng Zai Lat Naw, Ginsup Komiti Ningbaw hku nna shadang Shanghting Brang Li hte shadang Lamung Bawk Htun ni kaw nna shang lawm ra lata hkam ai re.

Ra lata poi lamang hta sindan pa masat grau law ai shayi shadang sha ni gaw ningbaw magam lit hpe gun hpai sa wa na rai nna, sindan pa masat yawm ai ni gaw ningtau ningbaw lit hpe gun hpai sa wa na re.

Laiza Muklum Ramma Komiti Ningbaw lit hpe shadang Kumhtat Naw Lawn, Ramma Komiti Amu Madu lit hpe shadang Maji Myu Myat, Hpaji Ningli Komiti Ningbaw lit hpe Shayi Lagoit Myu Pan, Shingni Komiti Ningbaw lit hpe shadang Chyinghtawng Zai Lat Naw hte Ginsup Komiti Ningbaw lit hpe shadang Lamung Bawk Htun ni kaw nna gunhpai sa wa na re hpe chye lu ai.

Ra lata poi lamang hta Laiza Muklum Ramma woi awn komiti ningnan ni hpe lata san da lu sai rai nna, Laiza Muklum kata shanu nga ai asak 15 ning lahta na ramma ni 200 jan hte lak san saw shaga da ai kanu kawa ni yawng shanglawm nna awng dang ai hte galaw la lu sai lam chye lu ai.