Laknak kaba si hkrat kapaw ai majaw dum nta htenza hkrum
Oplus_131072
Hpakant ginra hta gumshem Myen hpyen dap ni laknak kaba hkrup mara gap shadam bun ai majaw, mungshawa dum nta htenza hkrum ai lam chye lu ai.
November shata praw 2 ya shana hkying 11:25am aten daram hta Hpakant Tatma kawng kaw na gumshem Myen hpyen dap ni laknak kaba hkrup mara gap shadam bun ai majaw, Maumau Bum mare na Salang Hkaraw La a, nta gudawng langai htenza mat ai lam, ginra masha ni kaw na chye lu ai.
120mm ngu maram lu ai laknak kaba si, Salang Hkaraw La a nta wang kaw wa hkrat kapaw ai majaw, gudawng langai htenza mat ai rai nna, mungshawa hkra hkala hkrum ai lam gaw hpa nnga ai re lam, ginra masha ni tsun ai kaw na matut chye lu ai.
Hpakant ginra hta gumshem Myen hpyen dap ni gaw, gasat gala majan nbyin ai shara hkan raitim, laknak kaba hte hkrup mara gap shadam bun ai lam, drone, nbungli ni hte hkrup mara gap gasat ai lam ni galaw nga ai majaw, mungshawa si hkala hkrum ai hte dum nta law law htenza hkrum nga ai re.
Gumshem Myen hpyen dap ni ya na zawn nbungli, drone, laknak kaba ni hte hkrup mara gap gasat ai lam ni galaw nga ai majaw, dai ginra na mungshawa ni hkrit tsang let sha hkawmsa nga ra ai hte nkau mungshawa ni hpyen hprawng koi yen nga ra ai re lam chye lu ai.
