Laknak kaba si hkrat kapaw ai majaw mungshawa asak si, hkala hkrum
Maw Mau Bum mare kaw gumshem Myen hpyen dap ni gap dat ai, laknak kaba si hkrat kapaw ai majaw mungshawa asak si sum, hkala hkrum ai lam chye lu ai.
September shata 12 ya shani Hpakant tatma kawng kawn gap dat ai laknak kaba si, Maw Mau Bum mare kaw wa hkrat kapaw ai majaw, mungshawa marai (1) asak si sum nna, marai (4) hkala hkrum ai lam, ginra masha ni kaw na chye lu ai.
Laknak kaba si hkrat kapaw ai hta Jan. Udi Roi Nu, U Hla Pye, Mg. Aung Lar Lay ni hkra hkala hkrum ai rai nna, Jan. Hpaga Htu Lum gaw asak si sum mat sai lam chye lu ai.
Hpakant Seng Tawng gumshem Myen hpyen balik dap hpe KIA ni zing madu la lu ai hpang, gumshem Myem hpyen dap kawn, laknak kaba, nbungli ni hte bawm wa jahkrat bun ai lam ni galaw nga ai hpe chye lu ai.
Gumshem Myen hpyen dap ni gaw mungshawa law law nga ai shara ni hpe gap masat tawn let, nbungli bawm, laknak kaba ni hte hkrup mara gap shadam bun ai lam ni galaw nga ai re.
