Laknak kaba si hkrat kapaw ai majaw mungshawa si hkala hkrum
Oplus_131072
Hpakant ginra hta gumshem Myen hpyen dap ni laknak kaba hkrup mara gap shadam bun ai majaw, mungshawa si hkala hkrum ai lam chye lu ai.
November shata 20 ya shana hkying 11:30pm aten daram hta Hpakant tatma kawng kaw na gumshem Myen hpyne dap ni, Seng Tawng mare de laknak kaba (10) lang jan hkrup mara gap shadam bun ai majaw, mungshawa marai (1) asak si sum nna, marai (5) hkala hkrum ai hte dum nta ni hten za mat ai lam, ginra masha ni kaw na chye lu ai.
Laknak kaba si Seng Tawng mare lawk (1, 2) hkan wa hkrat kapaw ai majaw, asak (2) ning re ma langai asak si sum mat nna, mungshawa marai (5) hkala hkrum ai hte dum nta, modo ni mung hten za mat ai re lam chye lu ai.
Gasat gala majan byin ai lam nnga ai kaw gumshem Myen hpyen dap ni ndai zawn laknak kaba hte hkrup mara gap shadam bun ai majaw, mungshawa si hkala hkrum ai re lam, ginra masha ni kaw na matut chye lu ai.
Hpakant ginra hta gumshem Myen hpyen dap ni gaw, ndai laman shawoi na hta grau laknak kaba hkrup mara ding yang gap shadam bun nga ai majaw, mungshawa si hkala hkrum ai hte dum nta hten za hkrum ai lam grau law wa nga ai re hpe chye lu ai.
