Lam Braw Yang mare masha ni hka hpyen a majaw lu hka ra kadawn nga

                                                                               Photo Credit; Patjasan Lby

Lam Braw Yang mare kaw Namti hka kaba wa ai majaw hka hpyen hkrum sha nna mare masha htinggaw 40 daram hkyak hkyak lu hka ra kadawn nga ai lam buga masha ni shana wa ai kaw na chye lu ai.

“Hka lim shang wa ai shaloi gaw hka htung kata hkan e mung hka shang ma ai rai nna nam dum hte hka htung mung, yawng maren mara rai hka hpring ma ai le. Dai zawn byin ma ai re majaw lu hka grai yak hkak nga ai.” nga nna Lam Braw Yang Pat Jasan Ningbaw Maran Yaw htung tsun dan ai.

Hka kaba wa ai gaw lai wa sai bat hpang masum ya shani kaw nna kaba wa ai rai nna, dai shana jang hka grai kaba wa ai hte masha nmai nga wa ai majaw htawt sit ra mat ai re.

Ya na zawn hka hpyen hkrum sha ai ni gaw ni nawn ai jinghku jingyu dum nta ni hte nkau mi gaw Sunday School jawng hkan e gan shanu shingbyi nga ai re.

                                                                                         Photo Credit; Patjasan Lby

Hka hpyen hkrum sha nga ai htinggaw 40 daram hpe Lam braw Yang pat Jasan hpung ni kaw nna mung August shata 20 ya shani hta madung ra kadawn nga ai lu hka hpe garum jaw nga ai re.

“Daini kaw nna gaw hka mung loi hkyet ai daram re majaw nkau mi chyawm mi gaw tinang dum nta de bai wa nga ai ni mung lawm ai le. Raitim ya ndai Wa Awng lawk kaw mung hka bai rawt wa ai masa rai taw nga ai. Ndai ni hpe mung naw maram taw nga ga ai. Dai hta grau jat wa ai masa rai jang gaw ndai ni hpe mung shara htawt sit ra wa na re” nga nna Pat Jasan Ningbaw matut tsun dan ai.

Namti mare hta ya na zawn hka kaba ai gaw shaning shagu byin ai lam nnga ai re. Mali ning daram hta she kalang hka kaba ai lam byin ai re hpe mung chye lu ai.