Lam galaw ai nga ai Power Five Star Company a modo wan nat kau ya ai masha ni hpe lu rim da
Myikyina Dap Kawng kaw lam galaw nga ai Power Five Star Company a modo lahkawng nat kau ya ai masha ni hpe June shata 22 ya shani hta lu rim da sai lam chye lu ai.
Ndai masha ni gaw myitkyina muklum kata Dap kawng Ngaw-chang lawk kaw na marai 4 hte Palana kaw na marai 1 rai nhtawm asak nhpring shi ai 16 ning daram re ai ramma marai masum mung lawm ai re.
July shata 22 ya shani Lu rim da ai masha marai 5 hpe Myitkyina Masat (1) Balik dap rung hta hkang zing tawn da ai rai nna daini na nhtoi hta mung Nawng Nang, Palana kaw nna marai 2 hpe matut sagawn rim na re lam chye lu ai.
Ndai modo 2 hpe woi awn nat ai wa yan gaw Power Five Srar Company kaw na bungli masha re.
“woi awn nat ai yan gaw mawdaw gau ai wa hte စပယ္ယာ hkan ai wa re. စပယ္ယာ hkan ai wa gaw bungli galaw let lata kaw ningma lu la ai majaw ahkang hpyi nna 2 ya tup bungli nsa ai re. Bungli bai sa ai shani gaw Company kaw nna mung gumhpraw mun lahkawng hpyet kau ya ai hku re. Rai jang gaw စပယ္ယာ hkan ai wa gaw shi a modo gau ai wa hte bawng ban la rai nna hpa nchye ai ma ni hpe tsa woi jaw lu let, modo woi nat kau dat ai hku rai nga” nga nna Dap kawng mare Uphkang Salang Maran Bawk Naw tsun ai.
Ndai lam hte seng nna dai ni na nhtoi hta tata rung kaw san jep ai lam galaw na re. Shanhte a bai htai wa ai hta mahta nna she tara rung kaw nna mung tara Upadi hte maren daw dan jahkrat sa wa na re.
Asak nhpring ai ma marai masum lawm ai rai nhtawm ndai masha ni gaw garum ai sha re lam, matut nna mung gara dam hte gara hku je yang jahkrat sa wa na ngu ai hpe garai nchye lu shi ai re lam, Mare Salang tsun ai kaw nna chye lu ai.
Dap Kawng modo lam hpe Power Five Star Company hte Myanpyi Tagon ( MPT ) Company kawn lit la galaw nga ai hta, Power Five Star Company a modo 2 hpe lai wa sai June shata praw 4 ya jahpawt hkying 2:20am aten daram hta wan nat kau hkrum ai majaw Power Five Star Company kaw nna amu hpaw da ai re hpe chye lu ai.
