Lam, mahkrai hpe Myen hpyen dap pawng hpawm hpung ni htu di jahten kau ya ai majaw, mungshawa ni yakhkak hkrum nga

Oplus_131072

Hopin ginra na lam, mahkrai ni hpe gumshem Myen hpyen dap pawng hpawm hpyen hpung ni htu di jahten kau ya ai majaw, mungshawa ni laiwa laisa yakhkak hkrum nga ai lam chye lu ai.

November shata 26 ya shani Hopin mare na Dinglung Pa mare de sa ai lam, mahkrai ni hpe gumshem Myen hpyen dap hte Sam Hkyeng P.T.Ts (SNA) pawng hpawm hpyen hpung ni htu di jahten kau ya ai majaw, mungshawa ni hkawmsa hkawmwa yakhkak hkrum nga ai lam, ginra masha ni tsun ai.

Dai ginra na mungshawa ni gaw ya htu di jahten kau ya ai lam, mahkrai ni hpe madung tawn let hkawmsa hkawmwa galaw nga ai rai nna, gumshem Myen hpyen dap pawng hpawm hpyen hpung ni htu di jahten kau ya ai majaw, mungshawa ni laiwa laisa yakhkak hkrum nga ai lam chye lu ai.

Nam Yang mare kaw mung, gumshem Myen hpyen dap hte Sam Hkyeng P.T.Ts pawng hpawm hpung ni, mungshawa ni a gat seng kata na arung arai ni hpe mya lu mya la lagu shaw la ai sha n-ga, gat seng ni hpe mung wan nat jahten kau ya ai lam galaw nga ai hpe chye lu ai.

Hopin ginra hta gaw gumshem Myen hpyen dap hte Sam Hkyeng P.T.Ts wuhpung ni, laiwa laisa mungshawa ni hpe jahkrit shama sawk jep ai lam, nta kata hkan mya lu mya sha ai lam galaw nga ai sha n-ga, hpyen shamu shamawt ai lam mung ding yang galaw nga ai majaw, gasat gala majan byin wa na hpe ginra masha ni hkrit tsang nga ai lam chye lu ai.