Lamyang ginra gasat gala majan byin
Waimaw, Lamyang ginra hta gasat gala majan byin nga ai lam chye lu ai.
January shata 20 ya jahpawt hkying 6:00am aten daram kaw nna, KIA pawng hpawm hpyen hpung ni shara la nga ai, Lamyang maga de gumshem Myen hpyen dap hte P.T.Ts pawng hpawm hpyen hpung ni hpyen shamu shamawt htu shadut wa ai majaw, gasat gala majan byin wa ai re lam, lit nga ai salang ni tsun ai.
Myitkyina M.P.Hk kaw nna mung, gasat gala majan byin ai shara de laknak kaba ni hte gap garum ya nga ai rai nna, ya aten lahkawng maga hpyen masa shaja hkat nga ding yang re ai lam chye lu ai.
Gumshem Myen hpyen dap hte P.T.Ts pawng hpawm hpyen hpung ni gaw, January shata 19 ya shani kawn hpyen shamu shamawt htu shadut wa ai majaw, ya na zawn gasat gala majan byin wa ai re lam chye lu ai.
Manmaw hpyen man ginra hta mung, KIA pawng hpawm hpyen hpung ni hte gumshem Myen hpyen dap ni gasat gala majan matut manoi byin nga ai rai nna, lahkawng maga hpyen masa shaja hkat nga ding yang re ai hpe chye lu ai.
