Lamyang ginra hta gasat gala majan byin
Oplus_131072
Waimaw Lamyang ginra hta KIA pawng hpawm hpyen hpung ni hte gumshem Myen hpyen dap ni gasat gala majan byin ai lam chye lu ai.
November shata 24 ya jahpawt hkying 9:00am aten daram hta KIA pawng hpawm hpyen hpung ni shara la nga ai grup yin maga de, gumshem Myen hpyen dap ni hpyen shamu shamawt htu shadut wa ai majaw gasat gala majan byin wa ai re lam, lit nga ai salang ni tsun ai.
Gasat gala majan byin ai hta lahkawng maga laknak kaba hte gap gasat hkat ai majaw, laknak kaba si langai Wu Yan mare kaw wa hkrat kapaw ai hta mungshawa marai (2) hkala hkrum ai lam nga ai raitim, tsang ra ai lam nnga ai, hkala hkrum ai mungshawa yan hpe Myitkyina tsi rung kaba de tsi tsi hkamla na matu wa htaw sa da sai lam, ginra masha ni kaw na chye lu ai.
Lamyang ginra hta gaw KIA maga kawn ndai laman, htu shadut htim gasat ai lam nnga ai raitim, gumshem Myen hpyen dap maga na ding yang ngu na hpyen shamu shamawt htu shadut ai lam galaw nga ai majaw, gasat gala majan jahkring hkring byin nga ai rai nna, ya aten lahkawng maga hpyen masa shaja hkat nga ding yang re ai lam chye lu ai.
