Lamyang ginra hta gasat gala majan byin
Waimaw Lamyang ginra hta gasat gala majan byin nga ai lam chye lu ai.
February shata praw 2 ya jahpawt hkying 7:00am aten daram kaw nna, Lamyang hpyen man de KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam, shawnglam lit nga ai salang ni kaw na chye lu ai.
Gasat gala majan byin nga ai aten, Myitkyina M.P.Hk kaw nna mung, laknak kaba hte gap garum ya nga ai hta ya aten lahkawng maga hpyen masa shaja hkat nga ding yang re ai lam chye lu ai.
February shata praw 2 ya jahpawt hkying 10:00am aten daram hta mung, Hpakant tatma kawng kaw na gumshem Myen hpyen dap ni gap dat ai laknak kaba si, Hpakant lahta tsang jawng kaw wa hkrat kapaw ai majaw, jawng htenza mat ai hte KG jawngma marai (2) hkala hkrum ai lam nga ai hpe chye lu ai.
Hpakant ginra hta January shata 31 ya shani kaw nna, KIA pawng hpawm hpyen hpung ni hte gumshem Myen hpyen dap ni gasat gala majan bai byin wa ai hta gumshem Myen hpyen dap gaw, laknak kaba ni hte hkrup mara gap shadam bun ai lam galaw nga ai hpe chye lu ai.
