Lamyang ginra na Myen hpyen dap hte P.T.Ts pawng hpawm shara (2) hpe KIA pawng hpawm hpyen hpung ni bai zing
Oplus_131072
Waimaw Lamyang ginra hta dap jung shara jahkrat nga ai, gumshem Myen hpyen dap hte P.T.Ts pawng hpawm hpyen hpung ni nga ai shara (2) hpe KIA pawng hpawm hpyen hpung ni bai gasat zing la lu sai lam chye lu ai.
October shata praw 8 ya jahpawt hkying 6:00am aten daram kaw nna, Lamyang ginra kata gasat gala majan byin nga ai hta Lamyang mare makau kaw shara la nga ai, gumshem Myen hpyen dap hte P.T.Ts pawng hpawm hpyen hpung ni nga ai shara (2) hpe KIA pawng hpawm hpyen hpung ni bai gasat zing la lu sai lam, shawnglam lit nga ai salang ni kaw na chye lu ai.
Ndai shara hta KIA pawng hpawm hpyen hpung ni nga ai aten, gumshem Myen hpyen dap ni nbungli, drone, laknak kaba ni hte laja lana wa gap gasat ai majaw, gan hting nut da ai shara hpe dai hpawt bai gasat zing la lu ai re lam chye lu ai.
Manmaw hpyen man ginra hta mung, shani shagu gasat gala majan matut byin nga ai sha n-ga, Hpakant ginra hta mung lahkawng maga hpyen masa shaja hkat nga ai hte shani shagu ngu na gasat gala majan byin nga ai re lam chye lu ai.
