Lamyang hpyen man maga de gasat gala majan byin nga

KIA Masat (5) Dap Ba, Masat (3) Dap Dung ginra Waimaw Lamyang hpyen man maga de gasat gala majan byin nga ai lam chye lu ai.

January shata praw 3 ya shana maga hkying 4:00pm aten daram kaw nna, Waimaw Lamyang hpyen man maga de KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam, lit nga ai salang langai tsun ai.

KIA pawng hpawm hpyen hpung ni shara la nga ai, Lamyang hpyen man maga de gumshem Myen hpyen dap n-gun 70 daram, htu shadut lung wa ai majaw, lahkawng maga man pa gasat gala majan byin nga ai lam chye lu ai.

Matut nna Manmaw Manje ginra hta mung, KIA pawng hpawm hpyen hpung hte gumshem Myen hpyen dap ni laiwa sai December shata praw 4 ya shani kaw nna dai ni du hkra, gasat gala majan matut byin nga ai lam chye lu ai.