Lamyang hpyen man maga de, laja lana gasat poi matut byin
Waimaw Lamyang hpyen man maga de, October shata praw 2 ya shana daw hkying 1:30pm aten daram kaw nna, gumshem Myen hpyen hte Pyi Tu Tsit pawng hpawm hpung ni hte KIA pawng hpawm hpyen hpung ni laja lana gasat poi matut byin ai lam chye lu ai.
Gumshem Myen hpyen dap hte P.T.Ts pawng hpawm hpung ni KIA pawng hpawm hpyen hpung ni shara la nga ai, Lamyang maga de bai htu shadut wa ai majaw, gasat poi byin ai re lam, shawnglam na lit nga ai salang ni kaw na chye lu ai.
Myitkyina M.P.Kh kaw nna mung, gasat poi byin nga ai Lamyang maga de, laknak kaba hte gap bun nga ai lam, ginra mungshawa ni tsun ai kaw na chye lu ai.
Manmaw deng 3 grup yin shara de mung, October shata praw 2 ya jahpawt hkying 10:20am aten hte shana daw hkying 6:00pm aten daram hta jet fighter hte bawm lahkawng lang wa gap gasat kau da ai lam, shawnglam shiga lawk kaw na chye lu ai.
Manmaw hpyen man shara de, shani shagu ngu na gasat gala majan laja nga ai hta KIA pawng hpawm hpyen hpung ni gan yen da ai shara nkau hpe October shata praw 1 ya shani hta bai gasat zingla lu ai lam chye lu ai.
