Lamyang hte Langse ginra Myen hpyen dap ni nbungli hte bai wa gap gasat

Waimaw Lamyang hte Langse ginra hta gumshem Myen hpyen dap ni nbungli hte bai wa gap gasat ai lam chye lu ai.

October shata 22 ya jahpawt hkying 7:40am aten daram hta Lamyang hpyen man de, Myitkyina kaw na rawt lung wa ai gumshem Myen hpyen dap Y-12 nbungli hte bawm wa jahkrat gap gasat ai rai nna, hkying 12:30pm aten daram hta gaw, Langse ginra de bawm (20) lang jan bai wa gap gasat ai lam, shawnglam lit nga ai salang ni tsun ai.

October shata 21 ya shani hta mung Lamyang, Langse, Hpakant hte Shwe Nyawng Pin ginra ni hta gumshem Myen hpyen dap ni nbungli hte wa gap gasat ai majaw, dum nta ni hten za mat ai lam nga ai re.

Gumshem Myen hpyen dap ni gaw Lamyang, Langse hte Hpakant ginra ni hta lagaw lam hku nna htu shadut shamu shamawt nga ai sha n-ga, ndai laman shani shagu ngu na nbungli hte wa gap gasat ai lam ding yang galaw nga ai hpe chye lu ai.