Lamyang hte Manmaw ginra hta gasat gala majan matut byin nga
Waimaw Lamyang hte Manmaw ginra ni hta KIA pawng hpawm hpyen hpung ni hte gumshem Myen hpyen dap ni gasat gala majan laja lana matut byin nga ai lam chye lu ai.
September shata 26 ya shani hta Lamyang ginra de gumshem Myen hpyen dap hte P.T.Ts pawng hpawm hpyen hpung ni hpyen n-gun law law hte htu shadut wa ai majaw, KIA pawng hpawm hpyen hpung ni hte laja lana gasat gala majan byin ai lam chye lu ai.
Gasat gala majan laja nga ai, Lamyang hpyen man de hpyen garum sa wa ai, Danai Hk.M.Y (318) dap na Dap Up mung, September shata 26 ya shani na majan hta si mat sai lam, shawnglam lit nga ai salang ni kaw na chye lu ai.
Manmaw ginra de mung gumshem Myen hpyen dap ni ndai laman shani shagu ngu na htu shadut wa ai majaw, September shata 26 ya shani Manmaw nbungli pa hte manau wang grup yin shara ni hta gasat gala majan laja lana byin nga ai re.
Gumshem Myen hpyen dap ni gaw, lagaw lam hku nna htu shadut nga ai sha n-ga nbungli, drone, laknak kaba ni hte mung laja lana gap gasat nga ai majaw, gasat gala majan gaw lani hte lani grau grau laja wa nga ai lam chye lu ai.
Hpakant ginra hta mung, gumshem Myen hpyen dap hte KIA pawng hpawm hpyen hpung ni shani shagu ngu na gasat gala majan byin nga ai rai nna, Hpakant Byuha kawng kaw nna mung laknak kaba hte hkrup mara gap shadam bun nga ai sha n-ga, nbungli, drone ni hte ding yang ngu na gap gasat nga ai majaw, mungshawa si hkala hkrum nga ai rai nna, dum nta ni law law hten za mat sai hte hpyen koi yen ai mungshawa ni mung lani hte lani grau grau law wa nga ai lam chye lu ai.
