Lamyang mare hta gasat gala majan byin

Lamyang mare baw grup yin hta KIA hte gumshem Myen hpyen dap ni gasat gala majan byin ai lam chye lu ai.

June shata praw 8 ya shana daw hkying 2:05pm aten daram hta Wu Yan kaw na lung wa ai, gumshem Myen hpyen dap hte Myen hpyen dap n-pu P.T.Ts pawng hpawm hpyen hpung ni hpe KIA pawng hpawm hpung ni hkap shingla gasat ai kaw nna,  gasat gala majan byin wa ai lam, lit nga ai salang langai tsun ai.

Minute 35 ram gasat gala majan byin ai hta gumshem Myen hpyen dap maga si, hkala kade ram nga ai hpe tup hkrak nchye lu ai nga nna, salang wa matut tsun ai.

Hkying 4:00pm aten daram hta mung, Myitkyina kaw na rawt wa ai gumshem Myen hpyen dap nbungli (2) hte Waimaw, Awng Mye (1, 2) grup yin de bawm wa jahkrat bun ai lam chye lu ai.

Bawn wa jahkrat bun ai hta mungshawa a dum nta ni hten za mat ai lam nga ai rai nna, gade ram hten za mat ai hpe tup hkrak nchye lu shi ai.