Lamyang mare kata Myen hpyen dap ni hpyen shamu shamawt htu shadut ai lam ding yang galaw nga
Waimaw ginra Lamyang mare kata gumshem Myen hpyen dap ni hpyen shamu shamawt htu shadut ai lam ding yang galaw nga ai hpe chye lu ai.
May shata kawn Lamyang mare kata, gumshem Myen hpyen dap ni hpyen shamu shamawt htu shadut ai lam ding yang galaw nga ai hta KIA ni nga ai shara de htu shadut ai lam ni galaw nga ai majaw, gasat gala majan mung jahkring hkring byin nga ai rai nna, ya aten du hkra lahkawng maga hpyen masa shaja hkat nga ding yang re ai lam, lit nga ai salang ni kaw na chye lu ai.
Gumshem Myen hpyen dap ni gaw, Lamyang mare kata hpyen shamu shamawt htu shadut nga ai hta nbungli, laknak kaba ni hte mung hkrup mara gap gasat ai lam ni galaw nga ai majaw, dai ginra na mungshawa ni hpyen koi yen nga ai re.
Ndai zawn mungshawa ni hpyen koi yen nga ai aten galu wa sai hte maren, malu masha ni yakhkak wa ai sha n-ga, jawng lung aten ladaw mung rai wa sai majaw, jawngma ni jawng lung jawng sa yakhkak nga ai lam chye lu ai.
Hpakant ginra hta mung, gumshem Myen hpyen dap hte P.T.Ts pawng hpawm hpyen hpung ni hpyen n-gun htu shadut, shamu shamawt ai lam ni ding yang galaw nga ai rai nna, mungshawa ni hpe gap sat ai lam, dum nta ni hpe wan nat jahten ai lam ni galaw nga ai majaw, dai ginra na mungshawa ni hkrit tsang let hkawm sa nga ra ai lam chye lu ai.
