Lamyang mare maga de gasat gala majan byin

Waimaw ginra Lamyang mare maga de KIA hte gumshem Myen hpyen dap ni gasat gala majan byin nga ai lam chye lu ai.

March shata 21 ya shana daw hkying 3:00pm aten daram kaw nna, Lamyang mare maga de hpyen shamu shamawt sa wa ai gumshem Myen hpyen dap hte KIA ni gasat gala majan byin nga ai lam, shawnglam lit nga ai salang ni kaw na chye lu ai.

Gumshem Myen hpyen dap ni gaw March shata 17 ya shani kaw nna, Waimaw ginra de hpyen shamu shamawt n-gun jat bang nga ai hta ya na zawn gasat gala majan byin wa ai re lam chye lu ai.

Manmaw ginra hta mung KIA pawng hpawm hpyen hpung ni hte gumshem Myen hpyen dap ni gasat gala majan laja lana matut byin nga ai shata (3) jan sai re.