Langai lang na Kachin Lawt’ Di ( KLD ) gamchyam mahtai shapraw lamang galaw

Langai lang na Kachin Lawt’ Di ( KLD ) gamchyam mahtai shapraw ai lamang hpe Laiza Muklum, Sinpraw Majoi Gawknu kaw September shata 30 ya jahpawt hkying 9:30am aten hta galaw ai lam chye lu ai.

Daini shapraw lu ai KLD gamchyam mahtai nambat ni gaw 31-36- 15- 2- 6 ni re. Nambat langai kumhpa hpe kadai mung lu la ai lam nnga ai re majaw, hpang kalang na KLD gamchyam numbat langai kumhpa hta jat bang ya nna Kyats 120 ( Sen Latsa Hkun ) bai masat da ai. Nambat 2 hte 3 kumhpa kaji awng ai ni hpe gaw October shata praw 2 ya shani hkying 10:00am aten hta ni nawn ai lakmat dut counter ni hkan sa shaw la mai sai re lam KLD na Salang langai tsun ai.

Kachin Lawt Di ( KLD ) a gamchyam mahtai shapraw ai lam hpe shata mi hta kalang shapraw sa wa na rai nna, mungshawa n-gun jaw ai hta hkan nna shata mi hta 2 lang shing nrai 3 lang du hkra mung, shapraw sa wa na masing nga ai lam chye lu ai.

Kachin lawt’ di gamchyam nambat No.1 kumhpa hpe Kyats 10,000,000 ( Sen Latsa ) masat ai. Nambat 2 kumhpa hpe Kyats 100,000 ( Sen Langai ) Nambat 3 kumhpa hpe Kyats 25,000 ( Mun Lahkawng Hkying Manga ) Nambat 4 kumhpa hpe gaw gamchyam lakmat langai kumhpa jaw ai.

Kumhpa awng ai ni gaw tinang hkum dingdek nan sa shaw la ra na, masha malai hte nlu shaw la lu na rai nna, sumtsan de du ai ni hpe gaw Phone nambat hte video call hte jahkaw la nna she kumhpa hpe shale ya ai re lam chye lu ai.

Kumhpa awng ai ni gaw shata 6 laman sa shaw la ra na, shata 6 jan tim nsa shaw la ai kumhpa ni hpe gaw KLD bungli madu ni kawn zingla kau nna, gara masa hku raitim htuk jaw ai lam n galaw na re lam KLD ni tsun da ai.

KLD gamchyam lakmat ni hpe Laiza, Je Yang, Hpunlum Yang, Woichyai, Ja Htu Kawng, Nba Pa, Nhkawng Pa hte Mai Ja Yang ni hta dut shabra nga ai lam chye lu ai.