Langai lang na KSPP party hkumra zuphpawng galaw
Langai lang na KSPP party hkumra zuphpawng hpe Myitkyina Muklum, Shatapru Manau wang Majoi Gawknu kaw March shata praw 3 hte 4 ya shani 2 ya tup galaw na lam chye lu ai.
“Hkumra zuphpawng hta madung gaw KSPP party a hpaw shabawn tawn ai party ningbaw ni hpe shagrin ai lam galaw nna, hpaw shabawn hkrang policy laika buk hpe shagrin la ai lam ni, laika pa gam garan ai ya na lam hte seng nna shagrin la ai lam ni, komiti ni hku nna mung tang madun ra ai lam hpe tang madun ai lam hte ra lata poi shang na lam ni hte seng nna tsun sang lang dan ai lam ni galaw na re” nga nna KSPP party ningbaw Dr. Manam Tu Ja tsun ai.
2020 ning ra lata poi hta mungshawa ni ra sharawng ai dat kasa ni pru wa na matu, KSPP party gaw Jinghpaw mung hpe gawng malai tai ai party byin wa hkra shakut sa wa na matu hte ramma ni, amyushayi ni mung, mungmasa lam hta grau nna shang lawm wa lu na matu yaw shada ai re lam, KSPP Youth Ningtau Amu Madu Saranum Seng Nu Pan tsun ai.
Party hpe shagreng na matu hkumra zuphpawng galaw ai lam rai nna, party kaw nna matut galaw sa wa na lam ni, CC, EC lata san ai lam, KSPP party a shawng lam hte seng nna policy hpe shagreng ai lam hta amyu shayi ni ramma ni, mungshawa ni hte seng nna hkut hkut nai nai bawngban ai lam ni mung galaw sa wa na re hpe chye lu ai.
Hkumra hpawng hta Myo Ne shagu na KSPP party hpung shang masha myo ne komiti ni hte party shang hpaji jaw Salang ni yawng 300 jan sa du shang lawm ai lam chye lu ai.
