Langai lang na ningja jat wunkat yu hpawng galaw
Wunpawng Mungdan Shanglawt Asuya, Shiga Magam Dap kata na tatut bungli woi awn galaw nga ai magam gun hpu-awn tsang ni a shawng nnan lang na machye machyang ningja jat wunkat yu hpawng hpe September shata 10 ya shani hkying 10:00am aten hta Shiga Makan Dap zuphpawng gawk kaw galaw la lu sai re.
Ningja jat wunkat hpe July shata 21 ya shani kaw nna September shata praw 8 ya shani du hkra sharin wunkat galaw ai rai nna, wunkat hta Ninggawn Mungmasa hte Shanglawt Hpung a lam, KIO Rawt Malan Labau, Ningbaw Ningla jasat jasa lam, Hpyen Kai Chyan lam, Mungchying Kai Chyan lam hte laksan majat jaw ai lam (Special talk ni) ni hpe sharin ya ai re lam chye lu ai.
Daini na wunkat yu hpawng lamang hta Ningtau Ninggawn Amu Madu Salang Kaba Labang Doi Pyi Sa kaw nna wunkat yu shatsam mungga tsun ai hta,
“Shiga shapoi ai ni gaw lit kaba ai Sara re, daini anhte Sara lit kaw la nga ai ni gaw jahkum shatsup nna galaw ra ai bungli ni law law nga ai hpe mu mada ai. Shiga shapoi ai lam hta Wunpawng amyu sha ni a mying hpe hkum tsup ai hku jai lang lu yang kaja ai. Shawa a matu amyu a matu Sara bungli hku nna lit la lu hkra jahkum shatsup ai lam ni, hkaja ai lam ni anhte jaw ra ai, bungli galaw ai lam hta mung jau tau shajin ai lam hpe aten la nna galaw ai shaloi, shut ai lam yawm nna jaw ai lam grau rawt jat wa ai rai yang, shawa n-gun jaw ai, shawa madi shadaw ai shiga dap rai na” nga nna tsun ai.
Shiga Magam Dap Lithkam Du Up Jum Nhpang Naw Bu kaw nna mung, wunkat yu mungga tsun ai hta,
“Magam bungli grau awngdang na hpe yaw shada let hpu-awn tsang ni hpe ningja jat wunkat ngu hpaw ai re. Tinang hpe ap ya ai, jaw da ai magam lit gaw kade ram manu dan ai ahkyak ai hpe chye na nna, namsi zawn kung wa myin wa ai hpu-awn ni tai wa na hpe myit mada ai. Magam bungli hta grau shakut na sai ngu myit mada sai re. Lawu tsang ni hpe woi awn ai hta grau n-gun lu na sai ngu kam ai.
Magam bungli langai hpe rau jawm galaw ai masha ni gaw hkamla ai lam bung yang sha bungli awngdang ai, shada myit tau hkat chye ai, kanawn mazum pyaw ai. Rawt malan ai KIO magam gun ni rai ga ai majaw, ningawn mungmasa hte hpung pati a lam hpe chye hkap la ra ai. Rawt malan myit jasat, shanglawt myit jasat hpring tsup hte tinang hpe lit ap ya ai bungli lit a ntsa sadi dung nga ra ai. Ningja jat ya ai lam gaw kung zet ai hpu-awn byin tai wa na matu n-gun atsam myit marai jat ya ai lam re” nga nna tsun ai.
Hpawng lamang hta dai ni wunkat yu ai Sara/num ni marai 18 hpe wunkat yu lakmat jaw ai hte wunkat yu ai magam gun ni kaw nna mung sharin sara ni hpe chyeju dum kumhpa jaw ai lam galaw ai rai nna, hpawng lamang hpe KIC Ningbaw Malai (II) hte rau wunkat sharin sara ni, Shiga Magam Dap magam gun ni shanglawm ai hte galaw la lu sai re.
Photo Credit; Mai Mai Seng Lahpai
