Langse hte Lamyang ginra hta gasat gala majan matut byin
Langse hte Lamyang ginra ni hta gasat gala majan matut byin nga ai lam chye lu ai.
September shata 22 ya jahpawt kaw nna mung, Langse hte Waimaw Lamyang ginra ni hta KIA pawng hpawm hpyen hpung ni hte gumshem Myen hpyne dap hte Pyi Tu Tsit pawng hpawm hpyen hpung ni gasat gala majan matut byin nga ai lam, shawnglam lit nga ai salang ni kaw na chye lu ai.
Langse ginra de September shata 19 ya shani kaw nna, gumshem Myen hpyen dap hte Hkawnglanghpu P.T.Ts pawng hpawm hpyen hpung ni htu shadut wa ai kawn gasat gala majan byin nga ai re. Lamyang ginra de mung, gumshem Myen hpyen dap hte P.T.Ts pawng hpawm hpyen hpung ni htu shadut nga ding yang re majaw, gasat gala majan matut byin nga ai lam chye lu ai.
Ya aten gumshem Myen hpyen dap ni gaw Hpakant, Waimaw hte Manmaw ginra ni hta hpyen n-gun htu shadut htim gasat ai lam galaw nga ai sha n-ga nbungli, drone, laknak kaba ni hte shani shagu ngu na gap gasat nga ai majaw, mungshawa ni si hkala hkrum nga ai hte gasat gala majan mung lani hte lani grau grau laja wa nga ai re.
Gumshem Myen hpyen dap hte Samhkyeng (SNA) pawng hpawm ni shara jahkrat nga ai, Sagaing ginra Banmauk Muklum hpe September shata 20 ya shana maga hkying 6:40pm aten daram hta KIA hte PDF pawng hpawm hpyen hpung ni gasat zing la lu sai re.
Gumshem Myen hpyen dap maga sum machyi ai lam law wa ai hta KIO Ginjaw Laiza Muklum makau grup yin shara ni de, gumshem Myen hpyen dap ni, September shata 21 ya shana de hkying 3:00pm aten daram hta numdaw kalang, shana hkying 11:30pm aten daram hta kalang suicide drone hte wa gap gasat ai raitim, mungshawa hkra hkala ai lam nnga ai hpe na chye lu ai.
