Lashio Muklum kata laknak kaba a majaw, mungshawa marai 7 asak si sum

Lashio Muklum kata laknak kaba si hkrat kapaw ai majaw, mungshawa marai 7 bai asak si sum ai lam chye lu ai.

July shata praw 4 ya shani, Daw (9), Daw (12) hte Lashio Dakkasu jawng makau ni hta laknak kaba si hkrat kapaw ai majaw, mungshawa marai 7 bai asak si sum sai lam, ginra masha ni kaw na chye lu ai.

Ya aten Lashio ginra makau grup yin ni hta gumshem Myen hpyen dap hte laknak lang rawt malan hpung ni gasat gala majan byin nga ai hta lahkawng maga laknak kaba ni hte gap gasat hkat nga ai majaw, mungshawa ni asak si sum nga ai re hpe chye lu ai.

Ndai zawn gasat gala majan byin nga ai hta laknak kaba si, Lashio Muklum kata hkrat kapaw nna, mungshawa ni asak si sum ai lam ni byin nga ai hta July shata praw 3 ya shani hta mung, gumshem Myen hpyen dap a laknak kaba si a majaw, mungshawa marai 6 asak si sum ai lam byin sai re.