Law Mun Mare lam numshe kaw KIA hte gumshem Myen hpyen ni numdaw (2) lang gasat gala majan byin
Mungmyit Sinli Ga (Kachin Sub-state), KIA Masat (4) Dap Ba, Masat (8) Dap Dung ginra hta shamu shamawt chyinglau hkawm ai, gumshem Myen hpyen dap hte KIA Masat (29) Dap Nawng Dap Dung ni, September shata praw 9 ya jahpawt hkying 8:14am aten hta numdaw kalang, shana daw hkying 5:55pm aten hta numdaw (2) lang gasat gala jan byin ai lam chye lu ai.
“Tatma (77) kata na hpyen hpung ni rai ma ai, n gun gaw (50) daram re, Dai hpawt hkying 8:14am aten hta Kutkai lawu Nambachyi makau, Law Mun Mare de shang wa ai lam numshe kaw minute 20 daram manpa gap hkat ga ai. Ndai shara kaw sha dai na de hkying 5:55pm aten hta modo hpung ni hpe mung minute (20) daram du hkra bai hkap gap gasat ga ai” nga nna shawng lam na lit nga ai salang langai tsun dan ai.
Gasat poi hta anhte maga gaw hpa nra ai, Myen hpyen maga gaw si, hkala kade re tup hkrak n chye lu shi ai, bawm kapaw ai kaw gamawng ai lam gaw nga ai. Modo hpung ni hpe bai hkap gap gasat ai hta mung, modo (4) gaw gap hkat ai shara kaw hkring taw sai, hten ai nhten ai gaw atsawm n chye ai, nga nna salang wa matut tsun ai.
Gasat poi byin ai hte Kutkai gumshem Myen hpyen dap ni mung, sinat kaba hkrup mara gap shadam dat ai hta, Manjak Balawng mare kaw pala si (2) wa hkrat kapaw ai raitim, masha hta hkra hkala ai lam gaw nnga ai lam, Kutkai buga masha ni tsun ai kaw na chye lu ai.
September shata praw 6 ya shana hta mung, KIA Masat (29) Dap Nawng Dap Dung ni, gumshem Myen hpyen ni sin ai Sinli shang wa ai Asia world shagyit (Gate) kaw sa htim gap gasat ai lam mung nga ai.
Dai na maga hkying 5:55pm aten hta sha KIA Masat (6) Dap Ba, Masat (9) Dap Dung ginra, Man Bang Mare lai ai shara kaw Kutkai maga na lung wa ai, gumshem Myen hpyen modo hpung ni hpe KIA ni hkap gap gasat ai kawn minute 20 daram gasat poi byin ai lam chye lu ai.
Sinli kaw du shatup nga ai gumshem Myen hpyen modo yawng (67) rai nna, modo (35) gaw Gunlung lam maga de lung wa nhtawm, modo (10) jan gaman gaw Lashio maga de yu mat wa rai nna, ngam ai modo (20) jan gaw, Muse maga de lai lung wa ai hpe KIA ni hkap gap gasat ai re hpe mung chye lu ai.
