Lawa hpyen yen mungshawa ni hka kaba wa ai majaw yakhkak hkrum nga
Gasat gala majan a majaw hpyen hprawng koi yen nga ai, Lawa hpyen yen mungshawa ni hka kaba wa ai majaw, yakhkak hkrum nga ai lam chye lu ai.
Ndai laman marang htu kaba sawng ai majaw, July shata 17 ya jahpawt Lawa hpyen yen mungshawa ni hpyen koi yen nga ai shara hta hka kaba wa nna, shadu lu shadu sha, yup shara nga shara, hkawmsa hkawmwa hte jawngma ni jawngsa jawngwa lam amyu myu hta yakhkak hkrum nga ai lam, hpyen yen mungshawa ni kaw na chye lu ai.
Lawa hpyen yen mungshawa ni hta malu masha, nga shara, tsi mawan, lang rung lang rai, lu hka ni yakhkak nga ai kaw ya na zawn hka bai kaba wa ai majaw, hpyen yen mungshawa ni grau grau na yakhkak nga ai lam chye lu ai.
Lawa hpyen yen ni gaw laiwa sai March shata kaw nna, Lawa mare de gumshem Myen hpyen dap hte P.T.Ts pawng hpawm hpyen hpung ni shara la du shang wa ai hta gasat gala majan byin wa ai majaw, ya aten du hkra hpyen koi yen nga ai re lam chye lu ai.
