Lawa mare kaw wan hkru
Hpakant lung wa ai lam, Lawa mare lawk 3 kaw na Salang Hpawmaw Mung Ra a dum nta kaw March shata 25 ya shani hkying 2:15pm aten hta wan hkru ai lam chye lu ai.
“Nta hkru hpang wa ai gaw nta madu ding la wa yup ai npu gawk kaw hpumlum shadu lu ai rai nna, wan kachyi mi wut tawn da ai, de ntsa garap kaw pali shabawn ni mara da ai kawn wan kap wa nna, dai sum kawn hkru hpang wa ai, nta kaba de wan kap mat wa ai majaw, arung arai lama mi mung nlu shaw la ai re” nga nna Lawa mare na Salang langai tsun ai.
Wan hpe mungmare masha ni yawng sa nna hka jaw sat shazim ngut ai hpang, hkying hkum mi jan daram aten hta Kamaing wan sat dap ni sa nna kaji kajaw ra ai, ngam nga ai hpe bai sat kau ya ai re lam Salang wa matut tsun ai kaw na chye lu ai.
Hkru lawm mat ai ni gaw npu de wut hte galaw da nna ntsa de hpun pyen hte lachyaw da ai htap lahkawng nta, wut hte galaw da ai shat gawk, Mam dum ni, gumhpraw Sen Mali daram hte shanhte nta wang kaw nga ai arung arai ni yawng hkru lawm mat ai re hpe chye lu ai.
Wan hkru ai nta madu wa hpe seng ang ai ni kaw nna ahkyak la ai lam garai nnga shi ai rai nna, Lawa mare hta ndai shata laman nta 2 wan hkru sai re lam chye lu ai.
