Lawa mare lam mazup na gumshem Myen hpyen shagyit (Gate) kaw gasat gala majan byin
KIA Masat (9) Dap Ba, Masat (44) Dap Dung ginra, Kamaing de sa wa ai lam mazup na shagyit (Gate) kaw gumshem Myen hpyen dap hte KIA ni February shata 24 ya jahpawt hkying 6:00am aten daram gasat gala majan byin ai lam chye lu ai.
Ndai lam mazup hta gumshem Myen Hpyen Dap, Dapnu (33) kata na Hk.M.Y (11), Balik Dap hte Pyi Tu Tsit ni pawng hpawm nhpawm sin ai shagyit (Gate) hpe KIA ni sa htim gap gasat dat ai kawn gasat poi byin ai re lam chye lu ai.
Gasat poi byin ai shara de, Kaimang Byuha Kawng kaw na gumshem Myen hpyen ni laknak kaba hte hkrup mara gap shadam bun ai hta, lam mazup kaw gat seng hpaw ai U Ko Ko Oo laknak kaba pala hkyep hkra sawng ai majaw asak si sum mat ai lam na chye lu ai.
KIA Masat (1) Dap Ba, Masat (10) Dap Dung ginra, Mali Yang kaw nga ai gumshem Myen hpyen ni, February shata 22 ya shani hkying 11:58am aten daram hta KIA ni nga ai Sai Rawng Post maga de laknak kaba 30 lang jan hte Ngajinmi jak sinat ni gap bun ai lam, shawng lam hpyen shisawk ni kaw na chye lu ai.
