Lawa mare na kanu kawoi langai hpe Min Zay Thant hpyen hpung ni mazut roi rip
Lawa mare na kanu kawoi langai hpe Min Zay Thant P.T.Ts hpyen hpung ni mazut roi rip kau da ai lam chye lu ai.
July shata 28 ya jahpawt hkying 5:00am aten daram hta Lawa Lagawng mare na kanu kawoi langai hpe Lawa mare, lam braw kaw shara la nga ai Min Zay Thant P.T.Ts hpyen hpung ni mazut roi rip kau da ai lam, ginra masha ni kaw na chye lu ai.
Roi rip hkrum ai kanu kawoi gaw, asak (60) ning grup yin re kanu kawoi Jan. Hpauyam Hkawn Nan rai nhtawm, MZT P.T.Ts hpyen hpung ni kanu kawoi jan nga ai nta kaw shang wa nna mazut roi rip kau da ai re lam chye lu ai.
Lawa mare hta laiwa sai March shata kaw nna, gumshem Myen hpyen dap hte P.T.Ts pawng hpawm hpyen hpung ni shara bai wa la hpyen shamu shamawt nga ai hta gasat gala majan mung jahkring hkring ngu na byin nga ai hta mungshawa ni mung hpyen koi yen nga ai lam chye lu ai.
