Lawnghkang kaw gasat gala majan byin
Hpakant Lawnghkang mare kaw gasat gala majan byin nga ai lam chye lu ai.
February shata 14 ya jahpawt jau kaw nna, Lawnghkang balik dap hpe KIA pawng hpawm hpyen hpung ni sa htim gasat ai kaw nna, gasat gala majan byin wa ai re lam, lit nga ai salang ni kaw na chye lu ai.
Gasat gala majan byin nga ai hta Hpakant Byuha kawng kaw nna, laknak kaba ni hte hkrup mara gap bun nga ai majaw, mungshawa hkra hkala hkrum nga ai hte dum nta nkau mung hten za hkrum nga ai rai nna, lahkawng maga hpyen masa shaja hkat nga ding yang re ai lam chye lu ai.
Ndai zawn gasat gala majan byin wa ai majaw, dai ginra na mungshawa ni ya aten, madu shimlum dum ai shara ni de hpyen hprawng koi yen nga ai re lam chye lu ai.
Hpakant ginra hta gaw shani shagu ngu na gasat gala majan byin nga ai rai nna, gumshem Myen hpyen dap kawn gasat gala majan nbyin ai shara hkan raitim, laknak kaba ni hte hkrup mara gap bun nga ai majaw, mungshawa si hkala hkrum nga ai hte dum nta ni mung hten za hkrum nga ai re.
