Lockdown jahkrat ai majaw, Tawng Pyu mare masha ni shawa n gun madun

Hpakant, Tawng Pyu mare hta lockdown jahkrat ai shata mi jan wa ai majaw, October shata 27 ya shani mare uphkang rung shawng kaw shawa n gun 300 jan hte n gun madun ai lam na chye lu ai.

Ndai lam hte seng nna, Hpakant Amyu Sha Zinlum Hpung Amu Madu Salang Dashi Naw Lawn tsun ai hta “Lockdown jahkrat ai na wa ai majaw, mungshawa ni tam lu tam sha yak wa, lam shagu hta yak wa, nhkam wa ai lam hpe yawng myit lu wa ai majaw, kadai woi awn ai lam nnga ai sha, lockdown hpaw ya na matu n gun madun ai lam re” nga tsun ai.

Ya na zawn lockdown jahkrat ai lam gaw, Hpakant ginra hta shawng nnan COVID-19 ana, positive byin ai masha Tawng Pyu mare kaw wa nga ai re majaw, lockdown jahkrat ai lam, salang wa matut tsun ai.

Lockdown jahkrat da ai Tawng Pyu mare masha ni hpe COVID-19 komiti kaw nna, lani mi Myen gumhpraw sen 25 kyats hte N-gu, Sau ni hpe jaw sha taw nga ai lam chye lu ai.

Seng ang ai ni hku nna, n gun madun ai mungshawa ni hpe myit ya na lam hte seng nna bawngban jahkrup da ai lam nga sai majaw, mare masha ni matut nna n gun madun ai lam n galaw sai hpe mung chye lu ai.

Hpakant ginra hta Tawng Pyu mare hpe sha lockdown jahkrat da ai rai nna, kaga mare hkan na lai wa lai sa mungshawa ni hpe mung hkum pat da ai lam nga ai re.

October shata 26 ya shani hta mung, Tawng Pyu mare kaw sha COVID-19 ana kap masha marai 3 bai mu jat ai, ndai machyi masha ni hpe Yuma Quarantine dabang hta tawn da ai rai nna, Jinghpaw mung hta ana kap masha yawng marai 126, mai tsai nna tsi rung yu sai masha yawng marai 120 hte ya aten tsi tsi hkam la nga ai ana kap masha marai 6 nga ai hpe chye lu ai.

Photo Credit; EPN