Lockdown jahkrat tawn ai Munglai Hkyet mare na mungshawa ni hpe malu masha garum jaw
Ginjaw COVID-19 Ana Zinli Makawp Ninghkap Komiti kaw nna, ana zinli a majaw, lockdown jahkrat tawn da ai, Laiza Munglai Hkyet mare na mungshawa ni hpe October shata (29) ya shani malu masha wa du garum jaw ai lam chye lu ai.
Garum jaw ai malu masha ni gaw, sau, shakau, gala shapre, nga chahkraw ni rai nna, Munglai Hkyet mare na jau man mungshawa hte hpyen yen mungshawa htinggaw (200) jan hpe garum jaw ai.
Munglai Hkyet mare hpe lockdown galaw tawn ai (10) ya laman yak hkak ai lam hte seng nna Munglai Hkyet mare salang ya na zawn tsun ai.
“Lockdown ten re majaw, pru hkawm sa nmai ai, malu masha lam gaw yak hkak wa ai re, gumhpraw lap ajap lu tim gara kaw n mari sha ai. Lockdown galaw ai gaw kadai na majaw ma nre, aten masa hta hkan nna galaw ai re majaw, malu masha garum jaw ai a ntsa, yawng a gawng malai chyeju dum ai, matut nna mung pawnba la na hpe kam ai” nga nna tsun ai.
Munglai Hkyet kaw lai wa sai October (19) ya shani COVID-19 ana positive bai jep mu ai majaw, Ginjaw COVID-19 Ana Zinli Makawp Ninghkap Komiti kaw nna Munglai Hkyet mare hpe lockdown masat da ai re.
Munglai Hkyet mare na mungshawa yawng hpe COVID-19 ana dabat (8) lang jep chyoi ya sai rai nna, ya aten Munglai Hkyet tsi gawn lajang dabang kaw COVID-19 positive masha yawng marai (95) tsi tsi gawn lajang hkamla nga ai lam chye lu ai.
